طب أشتريكى بأيه و أرخص ما فيكى دمى ؟
هو انتى مرات أبويا ولا أنتى صحيح أمى
ولا أنتى بتبعدينى ولا أنت بتضمى
ولا انتى بتفرحينى و بتزودى همى
وبشرب من نيلك و بتشربى فى دمى
ازرع ارضك فرح و بتزودى غــــــــمى
اتقتل فى حضنك أخويا و أعتقل عمى
أمانه عليكى يا شيخة تحنى و إهتمى
انا مهما كان إبنك فاعقلى و إتلمى
ولو شفت العذاب الوان . هتفضلى أمى
انا بس خايف عليكى يقطعوكى و تترمى
يربطوكى فى ساقيه و تشتغلى و تتغمى
خيرك يبقى ليهم . و يطلع عين أمى
فقوليلى إنتى مين يلى ما تتسمى
و لو بردوا مش حبانى هتفضلى أمى
طب أشتريكى بأيه و دمى أغلى ما عندى
و إنتى كاتمه صوتى و مكبلة يدى
ده انا يا ماصبرت عليكى و قول أزمة و تعدى
عشت مستنى سنين لا باخد ولا بدى
طب أديكى أيه ورزقى على قدى
اسهر طوال الليل دماغى تجيب و تودى
بسألك بكرة هعيش و عمرك ما هتردى
لأن عمرى أكيد لا فى يدك ولا بيدى
و لما هتفت أغيرك ما حدا سمع ردى
كان نفسى ازرع فيكى ورد فى البساتين
صبوا على رصاصك فى حوارى وفى ميادين
ما خفش من ربنا و لا هموا أصول و لا دين
و حلل لنفسه دمى بشيوخ السلاطين
و احنا فدا نيلك لو شهدا بالملايين
نتظاهر فى شوارعك ايام شهور و سنين
ومهما عمل فينا فأحنا كمان صامدين
ده إحنا أحفاد قطز و أحفاد صلاح الدين
صابرين يا مصر وربك بشر الصابـــــــرين